Ж.Эрдэнэ

Энэ хөтөлбөр олон залууст хүрээсэй гэж чин сэтгэлээсээ хүсэж байна. YPG хөтөлбөрт орохоос өмнө ментортой болох, хувь хүний хөгжил, карьерын чиглэлээр ганцаарчилсан зөвлөгөө авах ойлголт надад хол санагддаг байлаа. Хөтөлбөрийн эхэн үедээ ментороосоо юу сурвал хамгийн их хэрэгтэй бол гэж их бодсон. Юун дээрээ ажиллавал илүү сайжрах, яаж менторшип гэх зүйл үр дүнтэй байх тухай ментий болгон маш сайн бодох хэрэгтэй гэж санагдсан. Миний хувьд ментортойгоо ярилцсаны дүнд илүү өөрийн харах өнцөг, хувь хүний хөгжил дээрээ ажиллахаар шийдсэн. Ментор маань “climate-tech” стартап болох URECA -ийн үүсгэн байгуулагч Э.Орчлон ах байсанд маш их талархаж байна. Бид хоёр ихэвчлэн өдрийн цагаар хамт хоол идэнгээ уулздаг байлаа, мөн WhatsApp -аар холбогдоно. Түүнчлэн, Э.Орчлон менторын өмнөх жилийн хоёр ментий нарыг цуглуулан хамт уулзаж, тэдний туршлага, хийж байгаа ажил, зорьж байгаа ирээдүйн төслүүдийг нь сонсож их урам зориг авсан. YPG хөтөлбөрийн өмнөх төгсөлтийн ментий нар ч өнөөдрийг хүртэл ментортойгоо холбоотой байгаа нь сайхан санагдсан. YPG хөтөлбөр нэг жилийн хугацаанд үргэлжилдэг ч насан туршдаа зөвлөгөө авч, хамт ажиллах, суралцах боломжтой гайхалтай хүмүүстэй учруулах боломжийг нээдэг хөтөлбөр гэж итгэж байна.