С.Цэрэндолгор

YPG-г хоёр үгээр тодорхойл гэвэл "цэвэр агаар" гэж хэлнэ. Мэргэжлийн салбартаа удаан ажиллахад хүн өөрөө ч мэдэлгүй вакуумжаад, зөвхөн тэр өнцгөөрөө харж дүгнэх гээд байдаг юм шиг. Гэтэл надаас огт өөр салбарын 12 ментор, мөн өөр өөр салбарын үеийн залуустайгаа танилцахад яг цэвэр агаар шиг шинэ мэдрэмж төрсөн. Жилийн өмнө өдийд би Их Британийн Чевенингийн тэтгэлэгт өргөдлөө явуулсан ч эцсийн байдлаар тэнцэх эсэхээ бүрэн хэлж мэдэхгүй, ерөнхийдөө хаана хүрэхээ мэдээд байгаа ч яаж явахаа яг таг зураглаж чадахгүй байсан. Яг одоо харин тэтгэлэгтээ тэнцээд, хүссэн сургуульдаа, хүссэн мэргэжлээрээ суралцаад, Английн Лондон хотоос бичиж сууна гэхээр тавьсан зорилтдоо хүрсэн байна. В.Ганзориг (Винзо) ментор маань карьер, мэдлэг, туршлагын хувьд надаас маш олон шат өндөр хүн хэрнээ өөрийнхөө үзэл бодлыг тулгахгүй, нэг бүрчлэн зааж зааварлахгүй, эсрэгээрээ найз нөхөд шиг зөвлөж, туршлагаа харамгүй хуваалцаж байсанд нь талархмаар. Ментортойгоо ярилцсан уулзалтуудаас гадна хөтөлбөрөөс үлдсэн хамгийн чухал зүйл нь өөр салбарын үеийнхээ мундаг залуустай танилцаж нөхөрлөсөн явдал байв. Тодорхой хэмжээнд үзэл бодол төлөвшчихсөн, салбар салбартаа байр сууриа бий болгоод явж байгаа хүмүүс болохоор хэн хэнийхээ үзэл бодлыг өөрчилж, тулгах гэхгүйгээр хамт суралцаж, юмыг илүү олон өнцгөөс харах боломжийг бие биедээ олгосон нь сайхан. Эргээд харахад олон хөөрхөн хүнтэй танилцан нөхөрлөсөн, карьерын хувьд урам авмаар олон гоё түүх тэмдэглэлийн дэвтэртээ хадгалчихсан байгаа нь зөвхөн нэг жилийн биш, олон олон жил үргэлжлэх “ололт” байлаа. Баярлалаа, YPG!