Saranchuluun Otgon

Отгоны Саранчулуун нь Монгол Улсад нийгмийн хөгжил, олон нийтийн эрүүл мэнд, боловсрол, хүртээмжтэй нийгмийн бодлогын шинэчлэлд манлайлан ажиллаж буй судлаач, бодлого боловсруулагч, хүний хөгжилд суурилсан өөрчлөлтийн төлөөлөл юм. Тэрээр Израилийн Иерусалим хот дахь Hebrew University–ийн Hadassah Braun School of Public Health-ийг төгссөн бөгөөд тус сургуулийн түүхэнд Монгол улсаас суралцсан цөөн төлөөллийн нэг юм. Мөн Израильд олон удаагийн бодлогын судалгаа, эрүүл мэндийн хөтөлбөр, шинжлэх ухаанд суурилсан инновацийн сургалтуудад хамрагдаж, судалгаа–бодлогын шилдэг туршлагыг Монголын нөхцөлд нутагшуулахад түлхүү анхаарч ирсэн. Саранчулуун нь нийгмийн ажил, олон нийтийн эрүүл мэндийн чиглэлээр хоёр магистр, докторын зэрэгтэй, олон улсын түвшинд хүлээн зөвшөөрөгдсөн судлаач. Тэрээр хөгжлийн бэрхшээлтэй иргэдийн эрх, эрүүл мэндийн хүртээмж, настны сайн сайхан байдал, дижитал хүртээмж ба технологид суурилсан нийгмийн бодлогын шинэчлэл зэрэг чиглэлд судалгаа, төсөл хэрэгжүүлж, бодит шийдэл, бодлогын санал дэвшүүлэн ажиллаж байна. Анагаахын Шинжлэх Ухааны Үндэсний Их Сургуулийн багш, “Ахиллис Монгол” ТББ болон “Ажиа Гэгээний Зөв Тэтгэлэг” сангийн үүсгэн байгуулагчийн хувиар тэрээр хөгжлийн бэрхшээлтэй хүүхэд, залуусын боловсрол, эрүүл мэнд, нийгмийн оролцоог дэмжих олон улс–үндэсний хөтөлбөрүүдийг амжилттай хэрэгжүүлж, олон мянган хүнд боломж, итгэл найдварын гүүр болж чадсан. Өдгөө Монгол Улсын Их Хурлын гишүүний хувиар тэрээр боловсрол, эрүүл мэнд, нийгмийн хамгаалал, хөгжлийн бодлогын шинэчлэлд манлайлан оролцож, хүн төвтэй, нотолгоонд тулгуурласан, тэгш боломжтой нийгмийг төлөвшүүлэхийн төлөө тууштай ажиллаж байна.